ՌԴ մշակույթի նախարարության կայքից տեղեկանում ենք, որ ս․ թ․ հունիսի 8-ից հուլիսի 10-ը Արևելքի ժողովուրդների արվեստի պետական թանգարանը կազմակերպում է ծնունդով շուշեցի հայ նկարիչ Էդմոնդ Պետրոսյանի նկարների ցուցահանդեսը։ Վերջինս կոչվում է «Էդմոնդ Պետրոսյան․առեղծվածներ Լեռնային Ղարաբաղից»։
«Որևէ գեղարվեստական կրթություն չստացած և վերջերս՝ 2019 թ․-ին, Ստեփանակերտում հոգին ավանդած նկարչի աշխատանքները գտնվում են ռուսական թանգարանների հավաքածուներում»,- նշվում է ՌԴ մշակույթի նախարարության հայտարարության մեջ։
Ցուցահանդեսի ժամանակ ներկայացվելու են հեղինակի շուրջ 60 գեղարվեստական աշխատանքներ։
Նշենք, որ նախարարության կայքում հայտարարության հետ մեկտեղ զետեղված է հեղինակի աշխատանքներից մեկը՝ Ստեփանակերտից դեպի Դաշուշեն գյուղի և Շուշվա բարձունք բացվող տեսարանով։
Հավելենք, որ Արևելքի ժողովուրդների արվեստի պետական թանգարանը գտնվում է Մոսկվայի Նիկիտյան բուլվար 12ա հասցեում։
